Calligraphy-29.11.2012

जेष्ठ गझलकार आणि कवी सुरेश भट ह्यांची ही " असेच हे" ही रचना 

असेच हे कसेबसे

कसेतरी जगायचे,

कुठेतरी कधीतरी

असायचे... नसायचे

असेच सोससोसता

हसून हासवायचे;

असेच हासहासता

हळूच विव्हळायचे

असाच राहणार मी

जिता तुरुंग आपुला,

अशाच बाळगीन मी

सुटावयास श्रृंखला

असाच हा गिळायचा

गळ्यामधील हुंदका

कसेबसे तगायचे

धरून धीर पोरका

अशीच येथली दया

हवेत चाचपायची;

अशीच जीवनास ह्या

पुन्हा क्षमा करायची

असाच श्वास तोकडा

पुन्हा पुन्हा धरायचा

असाच जन्म फाटका

पुन्हा पुन्हा शिवायचा

असेच पेटपेटुनी

पुन्हा पुन्हा विझायचे;

हव्या हव्या क्षणासही

नको नको म्हणायचे

असेच निर्मनुष्य मी

जिथेतिथे असायचे;

मनात सूर्य वेचुनी

जनात मावळायचे

कवी - सुरेश भट